ઈરાનના રાષ્ટ્રપતિ ઈબ્રાહિમ રાયસીનું હેલિકોપ્ટર અઝરબૈજાનથી પરત ફરતી વખતે દુર્ઘટનાગ્રસ્ત થયું હતું. ઈરાની મીડિયાએ રેડ ક્રેસન્ટને ટાંકીને કહ્યું કે રેસ્ક્યુ ટીમને ક્રેશ થયેલું હેલિકોપ્ટર મળી ગયું છે. ક્રેશ સ્થળ પરથી જે તસવીરો સામે આવી છે તેને જોતા આ દુર્ઘટનામાં કોઈના બચવાની આશા ઓછી છે. જો કે, રેડ ક્રેસેન્ટે રાષ્ટ્રપતિ રાયસી અને તેમની સાથે હેલિકોપ્ટરમાં મુસાફરી કરી રહેલા અન્ય લોકો જીવિત છે કે નહીં તે અંગે માહિતી આપી નથી. એક ડ્રોન વીડિયો સામે આવ્યો છે જેમાં ઈરાનના રાષ્ટ્રપતિનું હેલિકોપ્ટર ખરાબ રીતે ક્ષતિગ્રસ્ત જોવા મળી રહ્યું છે. રેસ્ક્યુ ટીમ હેલિકોપ્ટરમાં સવાર લોકોને શોધી રહી છે.
ઈરાનના પ્રેસ ટીવીએ એક્સ પોસ્ટમાં લખ્યું, ‘રેસ્ક્યૂ ટીમે રાષ્ટ્રપતિ ઈબ્રાહિમ રાયસીના ક્રેશ થયેલા હેલિકોપ્ટરની ઓળખ કરી લીધી છે. કોઈ જીવિત વ્યક્તિનો કોઈ પત્તો મળ્યો નથી. રાષ્ટ્રપતિના કાફલામાં ત્રણ હેલિકોપ્ટર સામેલ હતા, જેમાંથી બે સુરક્ષિત રીતે પરત ફર્યા હતા, પરંતુ જે હેલિકોપ્ટરમાં ઈબ્રાહિમ રાયસી સાથે ઈરાનના વિદેશ મંત્રી હુસૈન અમીર અબ્દુલ્લાહિયન, પૂર્વ અઝરબૈજાન પ્રાંતના ગવર્નર મલેક રહેમતી અને ધાર્મિક નેતા મોહમ્મદ અલી હતા તે પરત આવ્યું ન હતું. આ ત્રીજું હેલિકોપ્ટર ઈરાનના પૂર્વ અઝરબૈજાન પ્રાંતમાં દુર્ઘટનાગ્રસ્ત થયું હતું.
ઈરાનના સમય અનુસાર આ દુર્ઘટના રવિવારે બપોરે લગભગ 1 વાગ્યે (ભારતીય સમય મુજબ બપોરે 3 વાગ્યે) થઈ હતી. દુર્ઘટના બાદથી સતત સર્ચ ઓપરેશન ચાલી રહ્યું છે, જેમાં 40 ટીમો કાર્યરત છે. ઈરાની સશસ્ત્ર દળોના ચીફ ઓફ સ્ટાફ મોહમ્મદ બાગેરીએ હેલિકોપ્ટરની શોધ માટે સેના, ઈસ્લામિક રિવોલ્યુશન ગાર્ડ્સ કોર્પ્સ (આઈઆરજીસી) અને કાયદા અમલીકરણ દળોના તમામ સાધનોનો ઉપયોગ કરવાનો આદેશ આપ્યો હતો. તે જ સમયે, તુર્કીએ તેનું નાઇટ વિઝન હેલિકોપ્ટર એક બચાવ ટીમ અને 3 વાહનો સાથે ઈરાન મોકલ્યું હતું.
આ દુર્ઘટના બાદ આખું ઈરાન રાષ્ટ્રપતિ ઈબ્રાહિમ રાયસીના સ્વાસ્થ્યને લઈને ચિંતિત છે. સુપ્રીમ લીડર આયાતુલ્લા ખોમેનીએ પણ પોતાનું નિવેદન જારી કર્યું છે. તેમણે કહ્યું, ‘અમે આશા રાખીએ છીએ કે રાષ્ટ્રપતિ અને તેમના સહયોગીઓને રાષ્ટ્રની સેવામાં પરત ફરે. દરેક વ્યક્તિએ એ લોકોના ભલા માટે પ્રાર્થના કરવી જોઈએ. ઈરાનના લોકોએ અકસ્માતની ચિંતા કરવાની જરૂર નથી. દેશમાં ચાલી રહેલા કોઈપણ કામમાં કોઈ અડચણ નહીં આવે.
રાયસી અઝરબૈજાન કેમ ગયા?
વાસ્તવમાં ઈરાન અને અઝરબૈજાન પોતાના સંબંધો સુધારવા માટે અઝરબૈજાનમાં સામૂહિક ડેમ બનાવી રહ્યા છે. આ શ્રેણીનો આ ત્રીજો ડેમ હતો, જેનું ઉદ્ઘાટન કરવા ઈબ્રાહિમ રાયસી અઝરબૈજાન ગયા હતા. તેમને અઝરબૈજાનના રાષ્ટ્રપતિ ઇલ્હામ અલીયેવ દ્વારા ઉદ્ઘાટન કાર્યક્રમ માટે આમંત્રણ આપવામાં આવ્યું હતું.
અકસ્માતનું કારણ શું?
આ દુર્ઘટનાનું સાચું કારણ હેલિકોપ્ટર રેસ્ક્યુ ઓપરેશન પૂરું થયા બાદ જાણી શકાશે. જો કે, ઈરાની મીડિયાના અહેવાલો અનુસાર, શરૂઆતનું કારણ ખરાબ હવામાન હોવાનું કહેવાય છે. તેહરાન ટાઈમ્સના અહેવાલ મુજબ ગાઢ ધુમ્મસના કારણે આ અકસ્માત થયો હતો. આ દુર્ઘટના તેહરાનથી લગભગ 600 કિલોમીટર (375 માઇલ) ઉત્તર-પશ્ચિમમાં અઝરબૈજાન પ્રાંતની સરહદ પર, જોલ્ફા નજીક બની હતી. સુંગુન નામની તાંબાની ખાણ પાસે હેલિકોપ્ટર ક્રેશ થયું હતું. તે ઈરાનના પૂર્વ અઝરબૈજાન પ્રાંતમાં જોલ્ફા અને વરાઝકાન વચ્ચે આવેલું છે.
