અમરેલી જિલ્લાના રાજુલાના પટવા ગામ પાસે આજે બપોરના સમયે દરિયામાં નાહવા પડેલા ચાર યુવક ડૂબવા લાગતાં સ્થાનિકોએ ત્રણને બચાવી લીધા હતા. જ્યારે એક યુવક લાપત્તા થતાં શોધખોળ હાથ ધરવામાં આવી હતી. ઘટનાની જાણ થતાં રાજુલાના ધારાસભ્ય હીરા સોલંકી પણ દરિયાકાંઠે પહોંચ્યા હતા અને તરવૈયાની સાથે પોતે પણ દરિયામાં કૂદી પડ્યા હતા. જોકે કમનસીબે બે કલાકની શોધખોળ બાદ લાપતાત થયેલા યુવકનો મૃતદેહ હાથ લાગ્યો હતો.
રાજુલાના પટવા ગામ પાસે આવેલા દરિયાકિનારે આજે જીવન ગુજરિયા, કલ્પેશ શિયાળ, વિજય ગુજરિયા અને નિકુલ ગુજરિયા નામના યુવકો નાહવા માટે પડ્યા હતા. દરિયામાં કરંટ હોવાને કારણે ચારેય યુવકો ડૂબવા લાગતાં બૂમાબૂમ કરી મૂકી હતી. જેથી સ્થાનિકોએ દરિયામાં કૂદી જઈ ત્રણને બચાવી લીધા હતા, જ્યારે જીવન ગુજરિયા દરિયાના પાણીમાં ગરકાવ થયો હતો.
પટવા ગામના દરિયામાં દુર્ઘટના સર્જાઈ હોવાની જાણ થતાં રાજુલાના ધારાસભ્ય હીરા સોલંકી દરિયાકાંઠે પહોંચ્યા હતા. આસપાસના ગામના લોકો પણ દરિયાકિનારે ઊમટી પડ્યા હતા અને તરવૈયાઓ લાપત્તા થયેલા જીવન ગુજરિયાની શોધખોળ માટે દરિયામાં કૂદી પડ્યા હતા. આ સમયે ધારાસભ્ય હીરા સોલંકી પણ અન્ય તરવૈયાઓની સાથે દરિયામાં કૂદી પડ્યા હતા.
જીવન ગુજરિયા નામનો યુવક દરિયામાં લાપત્તા થયો હોવાથી હીરા સોલંકી અને અન્ય તરવૈયાઓએ શોધખોળ તેની હાથ ધરી હતી. બે કલાક સુધી શોધખોળ કરાયા બાદ કમનસીબે જીવન ગુજરિયાનો મૃતદેહ હાથ લાગ્યો હતો.
