મોરબી જિલ્લામાં વાંકાનેર શહેર નજીક ગઇ સાંજનાં ૮:૧૫ વાગ્યાની આસપાસ ઝાંઝર સિનેમા પાસે વાંકાનેર-મોરબી નેશનલ હાઇવે પર એક ટ્રક અને ત્રિપલ સવારી બાઇક વચ્ચે ગંભીર અકસ્માત સર્જાયો હતો જેમાં ત્રણ યુવાનોના ઘટનાસ્થળે જ કમકમાટીભર્યા મોત થયાં છે. આ ઘટના ની જાણ થતાં જ પોલીસ કાફલો ઘટનાસ્થળે દોડી ગયો હતો અને પોલીસ ટીમ દ્વારા ટ્રાફિક નિયમનની કામગીરી કરવામાં આવી હતી. પ્રાપ્ત થયેલી માહિતી મુજબ
નેશનલ હાઇવે ઉપર વાંકાનેર શહેર નજીક ઝાંઝર સિનેમા સામે સાંજના ૮:૧૫ વાગ્યાની આસપાસ હાઇવે બ્રીજ ચડતા જ એક ટ્રક અને ત્રિપલ સવારી બાઇક વચ્ચે ગંભીર અકસ્માત સર્જાયો હતો,
જેમાં ટ્રક નં. GJ 12 X 3945 ના ચાલકે ત્યાંથી પસાર થતા ત્રિપલ સવારી બાઇકને હડફેટે લેતા બાઇક સવાર ત્રણેય યુવાનો ફંગોળાઇ રોડ નીચે પડી ગયાં હતાં, જેમના શરીર પર મહાકાય ઓવરલોડ ટ્રકના તોતિંગ વ્હિલ ફરી વળતા ત્રણેય યુવાનોના ઘટનાસ્થળે જ કમકમાટીભર્યા મોત થયાં હતાં.આ સાથે જ આ બનાવમાં બે યુવાનોના મૃતદેહોને એમ્બ્યુલન્સ મારફતે હોસ્પિટલ ખાતે ખસેડવામાં આવ્યા હતા, જ્યારે એક યુવાનનો મૃતદેહ ટ્રકના વ્હીલ નીચે ફસાઈ જતાં જેસીબીની મદદથી યુવાનના મૃતદેહને બહાર કાઢવાના પ્રયાસો કરવામાં આવી રહ્યા હતા. અકસ્માતની જાણ થતા આજુબાજુના લોકો ઘટના સ્થળે દોડી આવ્યા હતા પરંતુ આ અકસ્માતના બનેલા ત્રણ યુવાનો કોણ છે તેની ઓળખ મેળવવાના પ્રયત્નો થઈ રહ્યા છે.
@શ્રીકાંત પટેલ, મોરબી
