IPL 2023માં મંગળવારે મુંબઈ ઈન્ડિયન્સ અને રોયલ ચેલેન્જર્સ બેંગ્લોર વચ્ચે મેચ રમાવાની છે. જો કે આ પહેલા જ રોહિતની પલટનને મોટો આંચકો લાગ્યો છે. ફાસ્ટ બોલર જોફ્રા આર્ચર(Jofra Archer) ફિટનેસને કારણે IPLની બાકીની મેચોમાંથી બહાર થઈ ગયો છે. પાંચ વખતની ચેમ્પિયન મુંબઈએ જણાવ્યું કે આર્ચર પોતાના દેશ ઈંગ્લેન્ડ પરત ફરશે અને ઈંગ્લેન્ડ ક્રિકેટ બોર્ડની દેખરેખ હેઠળ રહેશે. આ સાથે મુંબઈએ આર્ચરની બદલીની પણ જાહેરાત કરી છે.
મુંબઈએ કહ્યું કે આર્ચરની રિકવરી અને ફિટનેસ પર ECB દ્વારા નજર રાખવામાં આવી રહી છે. તે તેના પુનર્વસન પર ધ્યાન કેન્દ્રિત કરવા માટે ઘરે પરત ફરશે. મુંબઈએ આર્ચરના સ્થાને ઈંગ્લેન્ડના જ ફાસ્ટ બોલર ક્રિસ જોર્ડનને બનાવ્યો છે. જોર્ડનને મુંબઈએ બે કરોડ રૂપિયામાં પોતાની ટીમમાં સામેલ કર્યો છે. જોર્ડન અગાઉ ચેન્નાઈ સુપર કિંગ્સ સાથે છેલ્લી સિઝન રમ્યો હતો. તેને યોર્કર સ્પેશિયાલિસ્ટ માનવામાં આવે છે અને ડેથ ઓવરોમાં જોર્ડનની બોલિંગ શાનદાર છે. તે મુંબઈની ટીમ સાથે પણ જોડાઈ ગયો છે.
મુંબઈએ ટ્વિટર પર લખ્યું- ક્રિસ જોર્ડન બાકીની સિઝનમાં મુંબઈની ટીમ સાથે જોડાશે. જોર્ડને ટીમમાં જોફ્રા આર્ચરની(Jofra Archer) જગ્યા લીધી છે. જોર્ડને 2016માં આઈપીએલની શરૂઆત કરી હતી. અત્યાર સુધી તેણે 28 મેચ રમી છે અને તેના નામે 27 વિકેટ છે. આ સિવાય તેણે ઈંગ્લેન્ડ માટે 87 T20 રમી છે અને તેના નામે 96 વિકેટ છે. જોર્ડન છેલ્લામાં આક્રમક બેટિંગ પણ કરી શકે છે.
આર્ચર આ સિઝનમાં પોતાના નામ પ્રમાણે કંઈ ખાસ પ્રદર્શન કરી શક્યો નથી. ફિટનેસની સમસ્યાના કારણે તેને ઘણી મેચોમાં બહાર પણ બેસવું પડ્યું હતું. તેણે મુંબઈ માટે માત્ર ચાર મેચ રમી અને 10.38ના ઈકોનોમી રેટથી માત્ર બે વિકેટ લીધી. આ સિઝનમાં તેની બોલિંગ એવરેજ 83.00 હતી, જેને તે જલ્દીથી ભૂલી જવાનો પ્રયાસ કરશે. જોકે આ સિઝન પહેલા આર્ચરનું પ્રદર્શન શાનદાર રહ્યું હતું. તેના એકંદર રેકોર્ડ વિશે વાત કરીએ તો, આર્ચરે 39 IPL મેચોમાં 23.90ની એવરેજ અને 7.47ના ઈકોનોમી રેટથી 48 વિકેટ લીધી છે. 15 રનમાં ત્રણ વિકેટ તેની સર્વશ્રેષ્ઠ બોલિંગ છે.
ક્રિકેટ સમાચાર
મુંબઈ તરફથી રમતા આર્ચરે પંજાબ સામેની ઈનિંગની છેલ્લી ઓવરમાં 27 રન ખર્ચ્યા હતા. આ પછી ફેન્સ દ્વારા તેના ફોર્મ અને ફિટનેસને લઈને અનેક સવાલો ઉઠાવવામાં આવ્યા હતા. પંજાબ સામેની મેચમાં આર્ચરે ચાર ઓવરમાં 56 રન બનાવ્યા હતા. જોકે આ મેચ મુંબઈ છ વિકેટે જીતવામાં સફળ રહી હતી. જો કે, આ પછી આર્ચર ચેન્નાઈ સામેની મેચમાં પાછો ફર્યો અને ચાર ઓવરમાં 24 રન આપ્યા, પરંતુ તે કોઈ વિકેટ લઈ શક્યો નહીં.
