ગુજરાતની 26 લોકસભા બેઠકો પર લોકસભાની ચૂંટણી યોજાવા જઈ રહી છે. ગત ચૂંટણીઓમાં ગુજરાતની તમામ બેઠકો પર ભાજપ ક્લીન સ્વીપ કરતી રહી છે, તેથી સવાલ એ થાય છે કે શું આ વખતે પણ ગુજરાતની લોકસભાની ચૂંટણીમાં ભાજપ ક્લીન સ્વીપ કરી શકશે? દરમિયાન, ઈન્ડિયા ટીવી-સીએનએક્સનો ઓપિનિયન પોલ સામે આવ્યો છે, જે સ્થિતિ સ્પષ્ટ કરે છે. ઓપિનિયન પોલ મુજબ ભાજપ ફરી એકવાર ગુજરાતની તમામ 26 બેઠકો જીતી શકે છે. અહીં કોંગ્રેસ અને આમ આદમી પાર્ટીને એક પણ સીટ મળતી દેખાતી નથી.
ઓપિનિયન પોલ પ્રમાણે કોને કેટલી સીટ મળે છે?
ગુજરાતમાં કુલ બેઠકો- 26
ભાજપ- 26
કોંગ્રેસ- 00
AAP-00
ગુજરાતની આ હોટ બેઠકો પર ખાસ નજર-
ગાંધીનગર- લાલકૃષ્ણ અડવાણી અહીંથી 6 વખત સાંસદ તરીકે ચૂંટાયા હતા. અડવાણી બાદ કેન્દ્રીય ગૃહમંત્રી અમિત શાહ અહીંથી ચૂંટણી લડે છે. લોકસભા ચૂંટણી 2019માં અમિત શાહે કોંગ્રેસના ઉમેદવારને 5.5 લાખ મતોથી હરાવ્યા હતા. આ વખતે પણ ભાજપે આ બેઠક પરથી અમિત શાહને પોતાના ઉમેદવાર બનાવ્યા છે. જ્યારે કોંગ્રેસે સોનલ પટેલને ઉમેદવાર બનાવ્યા છે. ઓપિનિયન પોલ મુજબ અમિત શાહ ગાંધીનગર લોકસભા સીટ પર સરળતાથી જીત મેળવતા જોવા મળી રહ્યા છે.
રાજકોટ- ભાજપે આ બેઠક પર કેન્દ્રીય મંત્રી પુરષોત્તમ રૂપાલાને ટિકિટ આપી છે. રૂપાલા રાજ્યસભા છોડીને લોકસભાની ચૂંટણી લડવાના છે. ઓપિનિયન પોલ મુજબ રૂપાલા આ સીટ પરથી જીતતા હોય તેવું લાગી રહ્યું છે. મોહન કુંડારિયા લોકસભા ચૂંટણી 2019માં આ સીટ પરથી જીત્યા હતા.
નવસારી- આ બેઠક પરથી ભાજપના સીઆર પાટીલ ત્રણ વખત સાંસદ રહી ચૂક્યા છે. સીઆર પાટીલ ગુજરાત પ્રદેશ ભાજપના પ્રમુખ છે અને બૂથ મેનેજમેન્ટ માટે પેજ કમિટી મોડલના સફળ અમલ માટે પ્રખ્યાત છે. લોકસભા ચૂંટણી 2019માં પાટીલે નવસારી બેઠક પર રેકોર્ડ સાત લાખ મતોથી જીત મેળવી હતી. ભાજપે ફરી સીઆર પાટીલને પોતાના ઉમેદવાર બનાવ્યા છે. કોંગ્રેસના નેતા અહેમદ પટેલની પુત્રી મુમતાઝ પટેલે કોંગ્રેસ હાઈકમાન્ડને નવસારીથી ટિકિટ આપવા અપીલ કરી છે. મુમતાઝ પટેલ નવસારીથી ચૂંટણી લડે તો પણ સી.આર.પાટીલને હરાવી શકે એમ નથી લાગતું.
ભરૂચ- છેલ્લી 10 ચૂંટણીઓથી આ બેઠક ભાજપ જીતી રહી છે. ભાજપના મનસુખભાઈ વસાવા સતત 6 ટર્મથી સાંસદ રહ્યા છે. કોંગ્રેસના અહેમદ પટેલ આ બેઠક પરથી ત્રણ વખત સાંસદ રહી ચૂક્યા છે. કોંગ્રેસે આ સીટ AAPને આપી છે. AAPના ચૈતર વસાવા અહીંના ધારાસભ્ય છે અને તેઓ લોકસભાની ચૂંટણી લડી રહ્યા છે. ઓપિનિયન પોલ મુજબ ચૈતર વસાવા આ ચૂંટણી હારી શકે છે.
ભાવનગર – ભરૂચ બાદ ભાવનગર ગુજરાતની બીજી બેઠક છે જ્યાં અરવિંદ કેજરીવાલની આમ આદમી પાર્ટી કોંગ્રેસ સાથે ગઠબંધન કરીને ચૂંટણી લડી રહી છે. ભાવનગરમાં AAPએ ઉમેશ મકવાણાને ટિકિટ આપી છે. ભાજપ તરફથી નિમુબેન બાંભણિયા મેદાનમાં છે. ઓપિનિયન પોલ મુજબ ભાવનગર બેઠક પરથી ભાજપ આગળ છે.
બારડોલી- આ બેઠક આદિવાસી પ્રભુત્વ ધરાવતી બેઠક છે. ભાજપના પ્રભુભાઈ વસાવા અહીં 2 વખત સાંસદ છે. વિધાનસભા ચૂંટણી 2022માં અહીં એક રસપ્રદ મુકાબલો જોવા મળ્યો હતો, જ્યારે AAPને કારણે અહીં કોંગ્રેસનો પરાજય થયો હતો. જો કે હવે બંને પક્ષો સાથે છે, તેમ છતાં ભાજપ આ બેઠક પર આરામદાયક લાગે છે. ઓપિનિયન પોલ મુજબ બારડોલીથી ભાજપના ઉમેદવાર પ્રભુભાઈ વસાવા આગળ ચાલી રહ્યા છે.
સુરત- છેલ્લી 9 ચૂંટણીઓથી આ બેઠક પર ભાજપની જીત થઈ રહી છે. બીજેપીના દર્શના જરદોશ સતત ત્રણ વખત સાંસદ રહી ચુક્યા છે. લોકસભા ચૂંટણી 2019માં દર્શના જરદોષે કોંગ્રેસના ઉમેદવારને સાડા પાંચ લાખ મતોથી હરાવ્યા હતા. જો કે આ વખતે દર્શના જરદોષની ટિકિટ કપાઈ છે અને ભાજપે મુકેશભાઈ દલાલને ટિકિટ આપી છે. જ્યારે કોંગ્રેસે અહીંથી નિલેશ કુંભાણીને પોતાના ઉમેદવાર બનાવ્યા છે. ઓપિનિયન પોલ મુજબ મુકેશભાઈ દલાલ આ બેઠક પરથી ચૂંટણી જીતી શકે છે.
વડોદરા- આ બેઠક પર ભાજપ છેલ્લા 7 વખતથી ચૂંટણી જીતી રહ્યું છે. રંજનબેન ભટ્ટ છેલ્લા બે વખતથી અહીં સાંસદ છે. 2014ની લોકસભા ચૂંટણીમાં નરેન્દ્ર મોદી અહીંથી સાંસદ તરીકે ચૂંટાયા હતા, પરંતુ તેમણે આ બેઠક છોડી દીધી હતી. ઓપિનિયન પોલ અનુસાર આ સીટ પર પણ બીજેપી આગળ દેખાઈ રહી છે.
પોરબંદર- કેન્દ્રીય આરોગ્ય મંત્રી મનસુખભાઈ માંડવિયા પોરબંદરથી ચૂંટણી લડી રહ્યા છે. ગુજરાતની તમામ 26 બેઠકોની જેમ પોરબંદર બેઠક પણ ભાજપ માટે સલામત છે. તાજેતરમાં કોંગ્રેસના નેતા અર્જુન મોઢવાડિયા કોંગ્રેસ છોડી ભાજપમાં જોડાતા મનસુખભાઈ માંડવિયાની બેઠક વધુ પાક્કી થઈ હતી. ઓપિનિયન પોલ મુજબ મનસુખ ભાઈ માંડવિયાની જીત થતી જણાય છે. કોંગ્રેસને હજુ સુધી આ બેઠક પરથી ઉમેદવાર મળ્યો નથી.
