@મોહસીન દાલ, ગોધરા
મહીસાગર જિલ્લામાં લોકસભા ચૂંટણીઓ પૂર્વે મજબૂત ભાજપ વધુ મજબૂત થાય અને કોંગ્રેસનો સફાયો કરવાના ભાજપ પ્રવેશના ચાલી રહેલા અભિયાનમાં પંચમહાલ ભાજપ સાંસદ રતનસિંહ રાઠોડ અને સંગઠનના અગ્રણીઓની હાજરીમાં કસલાલ તાલુકા પંચાયત બેઠકના કોંગ્રેસના ઉમેદવાર ભેમાભાઈ પગીએ ભાજપ પ્રવેશનો કેસરીયો ખેસ ધારણ કર્યો હોવાના ભાજપ પ્રચારના ઉત્સાહ વચ્ચે ૨૪ કલાકમાં જ ભેમાભાઈ પગીએ કોંગ્રેસમાં ઘર વાપસી કરતા ભાજપનો રાજકીય ઉત્સાહ વરસાદના એક ઝાપટામાં ઓસરી જવા પામ્યો હતો.
એક તરફ લોકસભાની ચૂંટણીઓની તૈયારી ચાલી રહી છે ત્યારે બીજી તરફ દરેક પાર્ટીઓના નેતાઓ એક્શન મોડમાં આવી ચૂક્યા છે. ત્યારે જ મહીસાગર જિલ્લાના લુણાવાડા તાલુકાના કોંગ્રેસી આગેવાન અને કસલાલ તાલુકા પંચાયત સીટ પરથી કૉંગ્રેસ પક્ષમાંથી ચૂંટણી લડી ચૂકેલા ભેમાભાઇ પગીએ ગઈકાલે પંચમહાલ સાંસદ રતન સિંહ રાઠોડના હાથે ખેસ અને ટોપી પહેરી ભાજપમાં જોડાયા હતા અને જે બાબતના ફોટા પણ સોશિયલ મીડિયામાં વાયરલ પણ કર્યા હતા અને જેના ચોવીસ કલાક પણ નથી થયા ને આ કોંગ્રેસ આગેવાન આજે ફરી કોંગ્રેસનો ખેસ ધારણ કરી ઘર વાપસી કરતા ભાજપના સાંસદ સહિત જિલ્લાના મોટા નેતાઓને નીચું જોવા જેવુ થયું છે.
મહીસાગર જિલ્લાના લુણાવાડા કસલાલ તાલુકા પંચાયત કોંગ્રેસ પક્ષના તાલુકા પંચાયત સીટના ઉમેદવાર ભેમાભાઇ પગી પંચમહાલ સાંસદ રતનસિંહ રાઠોડ, મહીસાગર જિલ્લા ભાજપ મહામંત્રી રાવજીભાઈ પટેલ , અને પ્રદિપસિંહ તેમજ ભાજપના અગ્રણી કાર્યકર અજય દરજી સહિત અન્ય ભાજપના અગ્રણીઓની ઉપસ્થિતિમાં ગઈકાલે વિધિવત કેસરિયો ખેસ પેહરીને ભાજપમાં જોડાયા હતા. અને જે બાબતના ફોટા પણ ઉત્સાહભેર સોશિયલ મીડિયામાં વાયરલ કરવામાં આવ્યા હતા. ત્યારે આજે ફરી કોંગ્રેસમાં જોડાતા અનેક સવાલો ઉઠવા પામ્યા છે.
પ્રચાર પ્રસાર માટે ભાજપ દ્વારા કોઈપણ પ્રકારની કચાસ રાખવામાં આવી ન હતી. પરંતુ ફક્ત ૨૪ કલાકમાં જ આજે આ નેતા ભાજપ છોડી ફરી કોંગ્રેસનો ખેસ ધારણ કરી કોંગ્રેસમાં ઘર વાપસી કરતા ભાજપના નેતાઓ દ્વારા આ બાબતમાં કાચા સાબિત થયા હતા ઉતાવળે કાચું કાપ્યું હોય તેવું પ્રતીત થયું હતું.
આ ઘટનાને લઈ મહીસાગર જિલ્લા કોંગ્રેસના પ્રમુખે જણાવ્યું હતું કે સત્તાના જોરે લોકોને દબાવીને લોકશાહીનું હનન કરવાનો કારસો રચનાર ભાજપની માનસિકતા ખુલ્લી પડી ગઈ છે. અને લુણાવાડાની કસલાલ તાલુકા પંચાયત ઉમેદવાર ભેમાભાઈ નાનાભાઈ પગીને દબાણ કરીને પંચમહાલ સાસંદ અને જિલ્લાના મહામંત્રીઓ ભાજપમાં લઇ ગયા હતા. પણ ભેમાભાઈ પગી તાનાશાહી સામે ના ઝૂકતા કોંગ્રેસ પાર્ટીમા આજરોજ ૨૪ કલાકની અંદર જ પાછા ફર્યા છે. જેમનું જિલ્લા પ્રમુખ સુરેશ પટેલ, ધારાસભ્ય ગુલાબસિંહ ચૌહાણ સહિતના નેતાઓની હાજરીમાં કોંગ્રેસનો ખેસ પહેર્યો હતો અને ઘર વાપસી કરી હતી.
ભેમા પગી કાલે કોંગ્રેસ છોડી ભાજપમાં જોડ્યાના ૨૪ કલાકમાં પાછા કોંગ્રેસમાં ઘર વાપસી કરતા આ બાબતે મહીસાગર જિલ્લા ભાજપ પ્રમુખ દશરથસિંહ બારીઆને પૂછવામાં આવતા તેમણે જણાવ્યું હતું કે ભેમા પગી જોડાવવાના હતા તે જાણ્યું હતું. પરંતુ તે કાલે ભાજપમાં જોડાયા છે તેની ખબર નથી. પાર્ટી દ્વારા જે કોઈપણ વ્યક્તિ અન્ય પક્ષ છોડી ભાજપમાં જોડાય છે તેની સાથે પહેલા વાત કરી ખાતરી કરવામાં આવે છે. અને ત્યાર પછી ભાજપમાં સામેલ કરવામાં આવે છે. સાંસદ ચૂંટાયેલા પ્રતિનિધિ છે તેમણે ભેમા પગીને ભાજપમાં સામેલ કરવા માટે સારું કાર્ય કર્યુ છે. પરંતુ ભેમા પગી પાછા કોંગ્રેસમાં ગયા તે દુઃખની બાબત છે. ત્યારે સવાલ એ ઉભો થાય છે કે જિલ્લા પ્રમુખને જાણ કરવાનું ભાજપના નેતાઓએ મુનાસીબ માન્યું નહિ. અને જિલ્લા પ્રમુખની જાણ બહાર કોંગ્રેસ છોડી ભાજપમાં આવતા નેતાને વિશ્વાસમાં લેવામાં ઉતાવળ કરી નાખી કે પછી કંઈક કાચું કપાયું કે કોંગ્રેસ નેતા ૨૪ કલાક પણ ભાજપમાં રહયા નહિ અને કૉંગ્રેસમાં ઘર વાપસી કરી લીધી.
