1983 વર્લ્ડ કપ વિજેતા કેપ્ટન કપિલ દેવે ભારતીય ક્રિકેટ ટીમને લઈને મોટું નિવેદન આપ્યું છે. કપિલ દેવે ભારતીય ખેલાડીઓના વખાણ પણ કર્યા હતા. તો સાથે ફટકાર પણ લગાવી હતી. કપિલ દેવે પહેલા ભારતીય ખેલાડીઓના આત્મવિશ્વાસના વખાણ કર્યા હતા. પરંતુ આ પછી એવું પણ કહ્યું કે, ખેલાડીઓ પોતાને સર્વજ્ઞ માને છે. તેઓને કોઈની સલાહ લેવાની જરૂર જણાતી નથી.
કપિલ દેવે કહ્યું, ‘દરેક વ્યક્તિમાં મતભેદ હોય છે, પરંતુ આ ભારતીય ખેલાડીઓની એક સારી વાત એ છે કે તેઓ ઘણો આત્મવિશ્વાસ ધરાવે છે. પરંતુ નકારાત્મક મુદ્દો એ પણ છે કે તે બધું જ જાણે છે.
અનુભવી વ્યક્તિ હંમેશા મદદ કરી શકે છે
તેમણે કહ્યું, ‘ટીમના ખેલાડીઓ ખૂબ જ આત્મવિશ્વાસ ધરાવે છે. તેમને એવું લાગે છે કે તેમને કોઈની પાસેથી કંઈપણ પૂછવાની જરૂર નથી. જ્યારે હું માનું છું કે અનુભવી વ્યક્તિ હંમેશા તમને મદદ કરી શકે છે.’
ક્રિકેટરોને લાગે છે કે તેઓ બધું જ જાણે છે
પૂર્વ કેપ્ટને એમ પણ કહ્યું કે પૈસા સાથે ઘમંડ આવે છે. કેટલાક એવા ખેલાડીઓ છે જેમનો ઘમંડ તેમને સુનીલ ગાવસ્કર જેવા દિગ્ગજોની સલાહ લેવાથી પણ રોકે છે. કપિલ દેવે કહ્યું, ‘ઘણી વખત એવું બને છે કે જ્યારે વધુ પૈસા આવે છે ત્યારે તેની સાથે અહંકાર પણ
આવે છે. આ ક્રિકેટરોને લાગે છે કે તેઓ બધું જ જાણે છે.
તેમણે કહ્યું, ‘હું કહેવા માંગુ છું કે અહીં ઘણા ક્રિકેટરો છે જેમને મદદની જરૂર છે. જ્યારે સુનીલ ગાવસ્કર ત્યાં છે તો તમે તેમની સાથે વાત કેમ નથી કરતા? અહંકાર? તે સારો હોઈ શકે છે, પરંતુ 50 સિઝનથી ક્રિકેટ જોનાર વ્યક્તિ પાસેથી પણ મદદ લેવી જોઈએ. તે અનેક રીતે મદદરૂપ થઇ શકે છે. ક્યારેક કોઈની વાત સાંભળવાથી પણ તમારા વિચારો બદલાઈ જાય છે.
વિન્ડીઝ સામે બીજી વનડેમાં હાર
ભારતીય ટીમ હાલમાં વેસ્ટ ઈન્ડિઝના પ્રવાસ પર છે, જ્યાં તેને યજમાન વિન્ડીઝ સામે 3 મેચની ODI શ્રેણીની બીજી મેચમાં 6 વિકેટથી હારનો સામનો કરવો પડ્યો હતો. ટીમ ઈન્ડિયાએ માત્ર 182 રનનો ટાર્ગેટ આપ્યો હતો, જેને વિન્ડીઝે 80 બોલ બાકી રાખીને હાંસલ કરી સિરીઝ 1-1થી બરાબર કરી લીધી.
હવે વનડે શ્રેણીની ત્રીજી અને નિર્ણાયક મેચ 1 ઓગસ્ટે ત્રિનિદાદના બ્રાયન લારા સ્ટેડિયમમાં રમાશે. કેપ્ટન રોહિત શર્મા અને વિરાટ કોહલી બીજી વનડેમાં રમ્યા ન હતા. હાર્દિક પંડ્યાએ કમાન સંભાળી હતી. રોહિત અને કોહલીએ સતત ક્રિકેટ અને નવી વ્યૂહરચના હેઠળ આરામ લીધો હતો. તે ત્રીજી મેચમાં રમતા જોવા મળશે.
