મોરબી શહેરના પંચાસર રોડ પર સ્કૂલ બહાર પાર્કિંગ માં કાર માં દારૂનો જથ્થો રાખી વેચાણ કરતાં શખ્સ ને દબોચી લઈને પોલીસે ઈંગ્લીશ દારૂની છોતેર બોટલ જપ્ત કરીને કાર અને દારૂ સહીત પોણા બે લાખ ની મત્તા કબજે લીધી છે અને અન્ય આરોપીનું નામ ખુલતા પોલીસે તપાસના ચક્રો ગતિમાન કર્યા છે.
મોરબી શહેર એ ડીવીઝન પોલીસ ટીમ પેટ્રોલિંગમાં હોય દરમિયાન પંચાસર રોડ પર ફોર વ્હીલ કારમાં ઈંગ્લીશ દારૂ રાખી એક શખ્સ સત્યમ સ્કૂલ બહાર પાર્કિંગમાં ઈંગ્લીશ દારૂનું વેચાણ કરતો હોવાની બાતમી મળતા પોલીસ ટીમે સ્થળ પર રેડ કરી હતી જેમાં કારમાં સવાર શખ્સ ને નીચે ઉતારીને કારની તલાશી લેતા કારની ડેકીમાંથી ઈંગ્લીશ દારૂનો જથ્થો મળી આવ્યો હતો. પોલીસે વ્હીસ્કી નંગ છત્રીસ કીંમત રૂપિયા તેર હજાર પાંચસો તેમજ અન્ય બ્રાંડની વ્હીસ્કી બોટલ નંગ ચાલીસ કીંમત રૂપિયા બાર હજાર તેમજ વરના કાર કીંમત રૂપિયા દોઢ લાખ મળીને કુલ રૂપિયા એક લાખ પંચોતેર હજાર ની કિમતનો મુદામાલ જપ્ત કર્યો છે.
જે કારમાં સવાર આરોપી નિકુંજ ભરત કાવર રહે. રાજનગર પંચાસર રોડ મોરબી વાળાને ઝડપી લીધો છે અને જે દારૂનો જથ્થો મોન્ટુ પલ્લવ રાવલ રહે. શકત શનાળા તાલુકા મોરબી વારો આપી ગયાની કબુલાત આપતા આરોપી મોન્ટુ રાવલ વિરુદ્ધ પોલીસ મથકમાં ગુનો નોંધીને વધુ તપાસ હાથ ધરી છે.
@શ્રીકાંત પટેલ, મોરબી
