ચૂંટણી કોઈપણ હોય ગ્રામ પંચાયત તાલુકા પંચાયત જિલ્લા પંચાયત વિધાનસભા કે પછી લોકસભા દરેક ચૂંટણીમાં પૈસા અને દારૂની રેલમછેલમ જોવા મળતી હોય છે. ક્યારેક ચૂંટણીના સમયગાળામાં મોટી માત્રામાં રોકડ રકમ અથવા મોટી માત્રામાં દારૂ ઝડપાતો હોય છે તેમાં પણ ગુજરાત જેવા દારૂબંધી વાળા રાજ્યમાં ખાસ. ત્યારે પ્રશ્ન એ ઉપસ્થિત થાય છે કે આ ઝડપાયેલા દારૂ અથવા તો રોકડ રકમનું શું થાય છે શું તે જે તે વ્યક્તિને પાછી આપવામાં આવે છે કે પછી સરકારી તિજોરીમાં જમા થાય છે તો આવો જાણીએ આ વિશે વિગતે. ચૂંટણી સમયે કાળા નાણાંનો પણ થાય છે ઉપયોગ
ચૂંટણી સમયે કાળા નાણાંનો પણ ઉપયોગ વધી જાય છે. મોટાભાગના ઉમેદવારો ચૂંટણી લડવા માટે નાણાંં ખર્ચવા માટે પંચ દ્વારા નિર્ધારિત મર્યાદા કરતાં અનેક ગણો વધુ ખર્ચ કરે છે. કાળા નાણાંનો ચૂંટણી હેતુઓમાં ઉપયોગ થાય છે જેનો કોઈ હિસાબ આપવામાં આવતો નથી. તેથી જ અલગ-અલગ જગ્યાએથી પાર્ટીઓ અને ઉમેદવારોને જંગી રકમની રોકડ પહોંચાડવામાં આવે છે. આ માટે પોલીસ પણ તૈયાર છે. તે વાહનો અને શંકાસ્પદ દેખાતા લોકોની તપાસ અને પૂછપરછ કરતી રહે છે. આ સિવાય પોલીસને તેમના સ્ત્રોતો કે બાતમીદારો પાસેથી પણ માહિતી મળે છે. પછી તે દરોડા પાડે છે અને રોકડ અથવા દારૂ જપ્ત કરે છે.
રોકડ પર થઈ શકે છે ક્લેમ
ચૂંટણી દરમિયાન પોલીસ દ્વારા જપ્ત કરવામાં આવતી રોકડને આવકવેરા વિભાગને સોંપવામાં આવે છે. હવે જે વ્યક્તિ પાસેથી રોકડ જપ્ત કરવામાં આવે છે તે જો એવું સાબિત કરી દે કે આ નાણાં ગેરકાયદે કમાયા નથી અને તેના પોતાના છે તો આ રોકડ પર ક્લેમ પણ કરી શકે છે. આ માટે વ્યક્તિએ પુરાવા તરીકે સંપૂર્ણ માહિતી રજૂ કરવાની રહે છે ત્યારબાદ જ તેને તેને પૈસા પરત કરવામાં આવે છે. પુરાવા માટે, તમારી પાસે એટીએમ ટ્રાન્ઝેક્શન, બેંકની રસીદ અને પાસબુકમાં એન્ટ્રી હોવી જરૂરી છે. જો કોઈ જપ્ત કરાયેલા નાણાંંનો દાવો કરતું નથી, તો તે સરકારી તિજોરીમાં જમા કરવામાં આવે છે.
જપ્ત થયેલ દારૂનો કરવામાં આવે છે નાશ
ચૂંટણી દરમિયાન મોટી માત્રામાં દારૂ પણ પકડવામાં આવે છે. પ્રચારકો મતદારોને રીઝવવા માટે દારૂનો ઉપયોગ પણ કરે છે. જો દારૂની હેરફેર કાયદેસર હોય તો તેને છોડી દેવામાં આવે છે બાકી જો પૂરતા પુરાવા ન હોય તો તેને જપ્ત કરવામાં આવે છે. આ જપ્ત થયેલા દારૂને એક જગ્યાએ જમા કરવામાં આવે છે અને ત્યારબાદ કોઈ મોટી જગ્યાએ તેને રોલરથી કચડીને નાશ કરવામાં આવે છે.
